+994 12 497 01 33
AZ1014, Bakı şəhəri, Səməd Vurğun küçəsi 43, World Business Center.
Xəbərlər

   21 dekabr 2017-ci il tarixində  Azərbaycan Banklar Assosiasiyasının (ABA) təşkilatçılığı ilə “Bankçılıq Mükafatları-2017” adlı tədbir keçirilmişdir.

   ABA-ya üzv təşkilatların və tərəfdaşların müxtəlif nominasiyalar üzrə mükafatlandırılması məqsədilə keçirilən tədbirdə kommersiya banklarının yuxarı menecmenti, beynəlxalq maliyyə institutlarının ölkəmizdəki nümayəndəlikləri, ABA-nın nəzdində fəaliyyət göstərən Ekspert qruplarının rəhbərləri, tərəfdaş KİV-lər və digər dəvətlilər iştirak etmişdir.

   Tədbirdə ABA-nın prezidenti Zakir Nuriyev açılış nitqi ilə çıxış etmişdir. Bildirmişdir ki, 2017-ci il Azərbaycan Banklar Assosiasiyasının tarixində aktiv fəaliyyət ili kimi yadda qalmışdır. Bu ildə ABA ekspertləri bir sıra qanun layihələrinin, eləcə də normativ aktların hazırlanması və tətbiqi məsələlərində yaxından iştirak etmişdir.  Beynəlxalq praktikaya uyğun olaraq, ABA-nın nəzdində Bank Ombudsmanı yaradılmış, Bank ombudsmanının fəaliyyəti sahəsində beynəlxalq təcrübənin öyrənilməsi məqsədilə ABA-nın təşəbbüsü və təşkilatçılığı, Mərkəzi-Şərqi Avropa və MDB ölkələrinin bank ombudsmanlarının iştirakı ilə Bakıda beynəlxalq tədbir keçirilmişdir.

   Zakir Nuriyev, həmçinin bildirmişdir ki, Assosiasiya tərəfindən hazırda bütün dünyada aktual olan maliyyə-bank sektorunda kibertəhlükəsizlik məsələlərinə həsr edilmiş beynəlxalq İT konfrans keçirilmiş, “Bank sisteminin yeni inkişaf dövrünə adaptasiyası: islahatlar, nəticələr, perspektivlər” adlı II Bankçılıq Forumu keçirilmiş, Forum ərzində yerli və xarici ekspertlər tərəfindən maraqlı təqdimatlar edilmiş, faydalı fikir və təcrübə mübadiləsi aparılmışdır.

   Dövlət qurumları ilə, o cümlədən Azərbaycan Respublikasının Mərkəzi Bankı, Maliyyə Bazarlarına Nəzarət Palatası, Vergilər Nazirliyi, İqtisadi İslahatların Təhlili və Kommunikasiya Mərkəzi ilə, eyni zamanda beynəlxalq təşkilatlarla, o cümlədən Beynəlxalq Valyuta Fondu, Dünya Bankı, Beynəlxalq Maliyyə Korporasiyası, SECO ilə mövcud əlaqələr daha da genişləndirilmiş, sıx, qarşılıqlı faydalı işgüzar əlaqələr qurulmuşdur.

   ABA Avropa Banklar Federasiyası, Mərkəzi-Şərqi Avropa Banklar Assosiasiyası, Türkiyə Banklar Birliyi, Rusiya Banklar Assosiasiyası kimi qurumlarla da əlaqələri genişləndirmiş, il ərzində təcrübə mübadiləsi məqsədilə qarşılıqlı səfərlər gerçəkləşdirilmişdir.

   ABA-nın nəzdində çalışan ekspert qrupları aktiv fəaliyyət göstərmiş, il ərzində ekspert və işçi qruplarının, həmçinin xarici ekspertlərin iştirakı ilə 60-dan artıq görüş və dəyirmi masalar keçirilmiş, aidiyatı qurumlara 30-a yaxın, məktub-müraciət, təklif-tövsiyyə xarakterli sənədlər hazırlanaraq göndərilmiş, TV-lərdə və digər kütləvi informasiya vasitələrində 10-larla müsahibələr verilmiş, ekspert rəyləri cəmiyyətə çatdırılmışdır.

   Bank çalışanlarının motivasiyasını yüksəltmək, asudə vaxtın səmərəli təşkili və qarşılıqlı kommunikasiya məqsədilə müxtəlif tədbirlər, o cümlədən ənənəvi “Banklararası şahmat turniri”, “Breyn rinq çempionatı” və s. bu kimi tədbirlər həyata keçirilmişdir.

   Bütün bu işlərin reallaşdırılmasının ABA üzvlərinin aktiv dəstəyi, yaxından iştirakı və etimadı sayəsində mümkün olduğunu söyləyən Zakir Nuriyev bütün üzv-təşkilatlara və ABA-nın fəaliyyətinə dəstək verən hər kəsə təşəkkürünü bildirmişdir.

   Mükafatlandırma mərasimində qeyd edilmişdir ki, 2017-ci ildə banklar tərəfindən çoxsaylı korporativ sosial məsuliyyət layihələri, eləcə də təhsil və maliyyə savadlılığının dəstəklənməsi tədbirləri reallaşdırılmışdır. ABA, bu istiqamətlər üzrə həyata keçirilən layihələri qiymətləndirərək müxtəlif nominasiyalar üzrə ən fəal bankları seçmişdir.

   Belə ki, “Korporativ sosial məsuliyyət” nominasiyası üzrə “AccessBank” ASC, “Amrahbank” ASC, “Azər Türk Bank” ASC, “Bank of Baku” ASC, “Expressbank” ASC, “Xalq Bank” ASC , “Kapital Bank” ASC, “PAŞA Bank” ASC, "TuranBank" ASC  mükafatlandırılmışdır.

   “Ən fəal maliyyə savadlığı dəstəkçisi” nominasiyası üzrə “Azər Türk Bank” ASC, “NBCBank” ASC, “TuranBank” ASC mükafata layiq görülmüşdür.

   “Ən fəal təhsil dəstəkçisi” nominasiyası üzrə isə “Amrahbank” ASC, “Bank of Baku” ASC, “Bank VTB (Azərbaycan)” ASC və “Kapital Bank” ASC təltif edilmişdir.

   2017-ci ildə ABA ilə sıx işgüzar əməkdaşlıq etmiş dövlət qurumlarının nümayəndələrinə də mükafatlar verilmişdir. 

   Bundan əlavə “Qızıl partnyor” nominasiyası üzrə Beynəlxalq Maliyyə Korporasiyası, İsveçrə Əməkdaşlıq Təşkilatı (SECO), Almaniyanın Beynəlxalq Əməkdaşlıq üzrə Əmanət Kassaları Fondu, Ernst & Young, Altair MMC və Antaris MMC  kimi  beynəlxalq və yerli təşkilatlar təltif edilmişdir.

   Tədbirdə ABA ilə sıx əməkdaşlıq etmiş media nümayəndələrinə - informasiya agentliklərinə, iqtisadi yönlü xəbər portallarına və televiziya şirkətlərinə - “Media partnyor”  nominasiyası üzrə mükafatlar təqdim olunmuşdur.

   Sonda ABA-nın fəaliyyətinin əsas istiqamətlərindən birini təşkil edən, Assosiasiyanın nəzdində çalışan ekspert qruplarının il ərzindəki fəaliyyətlərinin qiymətləndirilməsinin nəticələri açıqlanmış və vurğulanmışdır ki, il ərzində ekspert qruplarının hər biri çox yüksək səviyyədə və peşəkarlıqla fəaliyyət göstərmiş, bank sektoruna aid məsələlərin həllinə əhəmiyyətli töhfələr vermişlər. Bu baxımdan ekspert qruplarının müküfatlandırılması “yaxşıların içərisindən ən yaxşılarını seçmək” mahiyyəti daşıyır.

   Beləliklə, “Ən fəal ekspert qrupu nominasiyası” üzrə “Çirkli pulların yuyulmasına qarşı mübarizə və komplayens üzrə” Ekspert qrupu 1-ci yer, “Ödəniş sistemləri və alternativ xidmət kanalları üzrə” Ekspert qrupu 2-ci yer, “Hüquqi məsələlər üzrə” Ekspert qrupu isə 3-cü yerə layiq görülmüşdür.

BİZİMLƏ ƏLAQƏ
AZ1014, Bakı şəhəri, Səməd Vurğun küçəsi 43, World Business Center.
+994 12 497 01 33 
 
XƏRİTƏDƏ GÖSTƏR
2018 © Bank Ombudsmanı | Bütün hüquqlar qorunur! | Apamark